Fasnacht 2025

Fascht jede Mensch wo me kennt
het dehaim e Büsi wo umme rennt.
Dr aint het e huffe, dr ander het ains
sälle het zwai und dr näggscht het kains.

Die härzige Lääbewääse wo kai Wässerli kenne triebe
sind doch soo syydig, me muess sy aifach liebe.
Aber achti, jetzt kunns ganz digg, das wottsch nid gheere
die blutti Woored kennt di vilicht versteere.

d Faggte ligge scho lang uff em Disch,
dass dis Samtpfeetli aigentlig e brutale Killer isch.
Denn goot die Katz emool ins Freie uuse,
isch nume mit schnüürrle und schmuuse.
Dert in dr d’Natur ka sy ire Jagdtriib nimmi verdränge
und emordet Reptilie, Amphibie und Veegel in rauhe Mänge.

Jetz isch aber nid numme ai Büseli dusse, das isch jo s Dumme,
nai, es seggle zwai Milliione vo dene umme,
und die mien pro Joor, das muess me emool saage,
fir e Dood vo dryssig Millione Veegel d Verantworig traage.

Do stellt sich diräggt scho emool d Froog:
Hän mir in dr Schwyz e Büsi-Bloog?
Jo, das hämer, kasch di nid dergege wehre.
S Lieblingshuustier vom Schwyzer duet sich schnäll vermehre.
D Tierschützer saage: gege die Iiberpopulation
hilft aigentlig numme d Kaschtration.
Isch so ne Stuubediiger emool dusse und nid kaschtriert,
ndo waiss allewyyl e jede, was dernoo bassiert.

Vyylmool het me d Kaschtrationspflicht versucht duure z bringe,
s het aber bis hitte nit welle glinge.
D Politigger wänn sich, wie mirs vo ihne kenne,
an so haiggle Theme d Finger nit verbrenne.
Si luege lieber zue, wie Katze in de Tierhaim derhär vegetiere,
und me uss em Ussland die näggschte duet importiere.
De Tierschützer ihri Versiech mit Kaschtratione
kenne sich uff jede Fall esoo nit lohne.
Anderscht umme het mes au nie brobiert,
dass me d Katzebesitzer halt kaschtriert.
Denn wurds nämlig uff das uuselaufe:
s gäbt kaini Nochkomme me, wo Katze kaufe.

Leinepflicht wär au no e Option fir das Dierli mit de glaine Taze,
aber s längt scho, wenn Lyt mit Hünd ummelaufe
wo usgsehn wie Katze.
S wird an dr Zyt, dass es d Politigger au ändlig raffe,
s git Momänt, do lohnt sichs, wenn me fir d Katz duet schaffe.
Aber bis die das wärde gseh,
hän mir wieder e Million Dachhase meh,
und Veegel kasch au kaini meh griege
will kaini me dien ummefliege.

Frei nach em Motto: «jo nyt unsichers aasträäbe»,
so lost sich’s in dr Politigg am beschte lääbe.
Drum sage mir, s isch jo kai Sach:
lieber e Spatz in dr Schnuure, als e Duube uff em Dach!