Im 16. Joorhundert hesch dr Wolf in dr Schwyz no iberall gseh

hytte isch är scho fascht niene meh.

Und taucht das Tier emool wieder naime uff,

verbraitet sich Panik und s‘git e riise Buff.

 

Numme will är im Wallis kurz vor em schysse

no schnäll e Schööfli isch go risse.

Das hätt är lieber underloo,

denn jetzt goot‘s los und zwoor eso:

 

Dr Schoofhirt wott sich das nid lo biete

und isch drfiir das Viech um z‘niete

aber wurd är das mache, so kemme d Klaage

will dr Tierschutz het jo au no eppis z’saage.

 

Die finde „kuum het e Wolf emene Nutztier dr Hals verränggt

wird grad ibere Abschuss noochedänggt“.

Wenn nämmlig e Hirt mit em Hund uff dr Waid wurd stoo,

getraut sich dr Wolf scho gar nid z‘ ko.

 

D Bärgbuure aber finde, är g‘heert verbannt

die Beschtie het dr Booge iiberspannt.

Es sin nid numme Schoof won är hett grisse

nai au Rindli, Gaissli und Ross hett är uff em Gwisse.

 

Guet - dä Wolf ka jo nid aifach in Laade laufe

und wenn är Rossfleisch will, e Lasagne kaufe.

au Abwäggslig muess syy, das isch esoo,

kasch dr Ranze nid numme mit Lamm voll schloo.

 

Nichts desto Trotz, mir Buure sages gschwind,

däm Viech g‘heert e Kuugele duure Grind!

 

Jetzt duet dr Tierschutz wiider revoluzze,

dr Abschuss wird eich gar nyt nutze,

die Schööfli g‘heere uff jede Fall

immer am Oobe wider in Stall.

 

 

 

Sisch sowyt, sy groote sich fascht in d‘Hoor

denn jede wirft em andere eppis vor.

 

d Bärgler saage: Tourismus, Schiilift und au dr Wintersport

das git‘s im Wallis an so vyyle Ort.

Das alles schaadet unserem Wild und dr Natur in grossem Stiil

und do g’heert me vo eich Tierlifrinde gar nid vyyl.

Aber uns grad welle d‘Buude yyrenne,

wenn mr däm Wolf ains uff e Pelz wänn brenne!

 

D Tierschützer sin au nid ruhig bliibe

und hän erklärt im BAFU het me Verhaltensregle gschriibe.

Dert drinn sig ganz genau expliziert,

wär darf wyterlääbe und wär verliert.

 

Isch e Raubtier brav, denn darf‘s nadyyrlig blyybe.

Abgschosse wärde numme d‘Problemfäll und die wo‘s iibertryybe.

 

Jetzt rieft e Oberwallisser Buur

mit grosser Schnuure und ganz sturr:

Sone Konzäpt isch jo scheen, numme haltet sich dr Wolf do dra,

solang är noonig lääse ka ?

Und usserdämm miesst me das no ins Wallisserdytsch iibersetze loo

damit au dr letschti Buur das Konzäpt ka verstooh.

 

So langsam git‘s au uns dr Booge

vyyllicht sott me emool s‘Schööfli und s‘Wölfli sälber frooge,

was die beide vo däm halte wie dr Mensch bestimmt

wär jetzt wäm sy Lääbe nimmt.

uff jede Fall – s‘ isch en alte Huet,

mischt dr Mensch sich yy, kunnts gar nid guet.

Dr Bund duet Schäde, wo dure Wolf entstande sind, vergiete.

Dr Schoofhirt soll so Schäde nach Meegligkait verhiete.

D Naturschützer blyybe wie immer,

sy schnuure dry und mache alles no vyyl schlimmer!

 

Faggt isch:  d‘Tierschützer und d Hirte wänn nid verliere

und wärde dä Kampf immer wyterfiere,

so dass sy linggs und rächts gar nyt me g‘sehn

und d Schööfli gmietlig uff d‘Waid uuse gehn

und dr Wolf sich dänggt „s‘isch my Glyggsdaag hytt“

wenn zwai sich stritte frait sich der dritt!

 

D Ladäärne-Uusstellig uff em Minschterplatz und d Waage-

und Reggwisyte-Uustellig bi dr Kasäärne sin vom Määntig

znacht bis am Mittwuch demoorge! Deert und an de 3 Ver-

kaufsständ (CINS) in dr Stadt ka men au alli Zeedel und

Schnitzelbängg, d Blaggedde und dr Rädäbäng kaufe.

 

 

Druggerey Sparn Magden