70 Joor Rhywasserkepf

 

Mir bligge zrugg und zwischedryy

syt sibzig Joor simmer voll derbyy

dr Grieg isch umme syt zwai Joor

do het dr Cele Beuret eppis grosses vor:

 

me kennt doch im Reschtorant Landhof hinde

e neii Waageglygge grinde

Die Idee het bi sine Frinde e Vollträffer glande

so sin anno 1948 d Rhywasser-Kepf entstande

 

Mer hän dr Waage derfe baue bim Landhof im Garte

zem pinggtlig an dr näggschte Fasnacht z starte.

Mit Sujets wie d „Wildsey-Invasion vo Schaffhuuse“

„d Flugiplatzstroos vo Basel no Blotze” uuse

 

„s Rhybadhysli vo s Meriarasins“ oder „spiilsch au Fäderballe ?“

sin die erschte baar Jeerli au scho gfalle

1969 hämer beraits eppis z‘fyyre

S isch s 20 schte mool, womer dr Waage dure Cortege styyre

 

Zää Joor speeter hesch dyne Auge fascht nid traut

underem Motto „e Schääse blibt e Schääse“ hämer usem Waage

e riise Schääse baut

Jetz dängged ihr sicher, die sin scho glunge

hän aifach so zäh Joor iibersprunge

Und das numme wäge däre bleede Schääse

aber was uff däm Zeedel fäält  - kasch allewyyl

uff unserer Homepage noochelääse.

 

Mir gehn ins Joor 1981, do isch‘s bassiert

dr Cele het dr Dienscht als Obmaa quittiert.

In de letschte 32 Joor het är e huffe driibe

het Waage baut, organisiert und Zeedel gschriibe.

Und in däre Zyt het sy Frau mit Stoff und Gnepf

Goschdym gnaait fir d‘Rhywasser-Kepf

 

E neiie Obmaa het sich schnäll g‘funde Gott sei Dangg

das Amt isch iibernoo worde vom Edi Frangg

In de näggschte Joore hämer Sujets ka

do dängge vyyli hytte no dra.

 

„s Jodler und Trachtefescht in Basel“ het sich empfoole

oder „dr Ziircher wo s‘Basler Polizeiboot het gstoole.

„Borggekääferfalle“ in dr Schwiz und „s Vitramuseum in Weil“

au „d Wiiderufffiehrig vom HD Läppli“ isch geil.

 

„D Schwizer Schiirennfahrer im Kääs-Schiidress“

oder dr „3D-Fixierbilderbuechstress“

sogar fir e „Cristo und s Beyelermuseum“ hets uns nit graue

e Waage mit verpaggte Bäum uffzbaue.

 

Im Joor Zwaidausig hets wider e neiie Obmaa gä

dr Jörg Flückiger het die Arbet derfe iibernää

und mittlerwyyle isch au s 50 zig-jeerige scho duure

aber mir sin immer noni uff dr Schnuure.

 

2003, kaschs in dr Zytig lääse

do sin d Gauner die prominänte Wääse

will d Insasse vom Wooghof schlange steehn

und aifach dur d Muure wider uuuse gehen.

ab so Gschichtli lachsch di hii

kai Wunder isch das im 2004 unser Sujet gsii.

 

Um d Wurscht isches denn fimf Joor speeter gange

wäg dr Hülle fire Glepfer hän alli dr Kopf lo hange

dr Darmvorroot goot uss, hets ghaisse

gsesch alli no de letschte Wirschtli gnaisse.

Unser Sujet „Darm Alarm“ wärde mir nimmi vergässe

und Glepfer dien mer hytte no frässe.

 

Im glyyche Joor dailt is dr Jörg denn mit,

es sig wichtig dass me de Junge Verantwortig iibergit.

So duet är sy Boschte als Obmaa wyterschiebe

sythär darf dr Lucien das Amt ussiebe.

Syt däm Wäggsel sin scho wider 9 Joor ins Land,

wie die Zyt vergoot, sich allerhand.

 

S sibzigschti Joor isch fir uns im gang

Sibzig Joor, das isch kaibe lang.

Aber numme wenn me zämmehebt, ka aim das glinge

do muess e jede eppis bringe.

 

Drumm isch‘s au klar, dass mir allne dangge wänn,

wo 70 Joor  mit und fir uns am Kaare zooge hänn.

Und mir wisse, wenn mer allwyyl eso wyter mache

hän d Rhywasser-Kepf die näggschte 70 Joor

no immer eppis z lache

___________________________________________________

 

D Ladäärne-Uusstellig uff em Minschterplatz und

D Waage-und Reggwisyte-Uusstellig bi dr Kasäärne

sin vom Määntig znacht bis am Mittwuch demoorge!

Deert und an de 3 Verkaufsständ (CINS) in dr Stadt ka

Men au alli Zeedel und Schnitzelbängg, d Blaggedde

und dr Rädäbäng kaufe.

Au mir dien unseri Ladäärne uff em Minschterplatz zeige!

 

Druggerey Sparn Magden