Wenn e Volgg drnääbe trumpt

 

MAKE AMERICA GREAT AGAIN

e Satz mit vyyl Bedyttig

Me g’heert ihn im Fäärnsee und sy schryybes in dr Zytig

s‘isch s‘Waalkampfmotto vom beschte Maa,

wo Amerika schyyns iiberhaubt ka ha.

318 Millione Amis hän‘s bim wääle verschlampt,

isch es wirgglig meeglig, dass e Wältmacht esoo drnääbe trumpt?

 

phyynlig het dr Trump s‘Waalkampfprozeedere duurezooge,

sich lächerlig g’macht, Schyssdrägg verzellt und d Lyt aaglooge,

und d‘US-Biirger, als wurd ihne e Stigg Hirni fääle,

diigere aane, und dien dä Prolet no wääle

 

Mir gänn zue, d Usswaal het nid vyyl Spiilruum gloo

oder wär‘s am Änd besser gsii, sy hätte d‘Clinton gno?

Die Usswaal isch schwiirig, das begriffe mir au

wenn me entschaide sott zwische Hampelmaa und Hampelfrau.

Faggt isch: e miehsams Wyyb wänn d‘Amis nit an dr Macht,

drumm het dä Grachbrueder Donald halt s‘Renne g’macht.

 

MAKE AMERICA GREAT AGAIN

me froggt sich allewyyl numme: wenn ?

d‘Amis findes cool und halte zu däm

jetz wärde sy g’fiehrt, aber numme vo wäm?

 

Vom ene chaotische Republikaner,

wo‘s mit aggressiver Rhetorigg schafft,

dass jede Amerikaner zue ihm uffe gafft.

Vo aim, wo im politisch korräggte USA

Fir‘s politisch korräggt syy kai Zyt will ha

e Presidänt, wo allem Aaschyyn aa

kai Inträssi fir grundleegendi Wärt wott ha

en Egoischt mit ere grosse Reere

wo sich ab brielende Buschi im Saal duet steere

das Baby, wo ihn intressiere duet,

isch uss Stai und lipft de Mexikaner dr Huet.

 

Zwische USA und Mexico will är e Muure – unbedingt!

drbyy het me in Berlin scho g’merggt, dass das nyt bringt.

Drno träumt är no, dä alti Babbe,

dass d‘Sombreroträäger d‘Koschte sälber berappe,

denn schliesslig sin d’Latinos, mir dien dr Trump zitiere,

die wo iber d‘Gränze kemme, und sich grimminell uffiehre.

Und die elf Millione illegale Yywanderer, het dr Donald beschlosse,

wärde ganz aifach wider uuse g’schosse.

 

Är schwätzt so vyyl, dä glunge Maa,

will schnuure isch das won är am beschte ka,

und Stutz verdiene kan är au sehr guet

das isch ebbis, wo kaine bezwyyfle duet.

Fascht alles het dä zue Gäld kenne mache

mit Hotels, Immobilie, Fäärnseesändige und andere Sache

sogar Gsellschaftsspiili dien sy Name traage,

und är spiilt mit dr Gsellschaft, das schloot is uffe Maage.

 

Ob Milliardär oder Proletarier, s‘schläggt kai Gaiss ewägg,

d‘Amis hän ihn welle - jetz hän si dr Drägg!

Dr Trump hinterfroggt d‘Häärkunft vom Obama, isch das e glatte,

är will d‘Geburtsurkunde g’seh, dä het doch e Schatte!

Und denn schimpft är sich Vollbluetamerikaner,

isch das nit e Schand?

Drbyy sin syyni Grosseltere Yywanderer uss em Schwoobeland

die sin in d‘Staate ko, ganz unversehrt,

anschyynend het no niene e Muure dr Wäg verspeert.

 

Au mit Diskriminierige duet dr Trumpel nid spaare,

dä Siech fahrt allewyyl jedem an Kaare.

Uff die Art kann är ums verregge

die aigeni Unsicherhait verstegge.

Är glaubt nid an Schwulehochzyte, das will doch kai Sau

aber drfyyr an Hochzyte zwische ryyche alte Männer

und ere vyyl jüngere Frau.

 

Wär soll die Amis denn no verstoo?

Sy wääle aifach e Gnoorzi, will‘s muess wytergoo.

Dummi und gscheiti Presidänte,

au wyssi und schwarzi hän si scho ka in däm Amt.

Jetz muess ändlig ebber aane, wo alles aabetrumpt.

Zem Byspiil e verruggte Diggdator, dr Donni het jo alles drfiir.

E Fluugi mit sym Name, goldigi Hiiser und goldigs Gschiir,

e aige Harem und Milliarde uff dr Bangg,

und är git zue, dass är e Schoofseggel isch,

und im Kopf zimlig grangg.

Das sin gueti Vorussetzige, mir kennes nid andersch beschriibe,

zem e ganzi Nation in Abgrund z’triibe.

 

Liebi Amerikaner, s‘isch laider kai Määrli

jetz händ ihr en an dr Bagge, dä bleedi Käärli

ergo wird är nid ebbe s‘Trumpelstilzli uffiere -

nai, als Mr President darf är jetzt regiere.

Ihr miend denn hoffe, wenn dr Donald „seines Amtes waltet“

Dass är ab und zue die richtige Hirnzälle yyschaltet.

Falls är immer no feschthaltet an sim Muurebau,

denn hälfet aifach mit, und sind schlau,

isch denn das Bauwärgg fertig und är goot eich uff e Sagg

denn schmaissed dä Depp iibere, zem beese Mexikaner-Pagg.

Und isch das erledigt, drno schreyet ihr denn :

 

„We make America great again” 

www.rhywasserkepf.ch