Mir „checken“ uss

 

Ändlig isch me bangsioniert,

dr Chef het aim au scho gratuliert.

Jetzt hesch Zyt fir all die Sache,

wo de friener no hättsch kenne mache

 

Beweege kasch di nimm so rächt,

gsundhaitlich gohts dr zwoor nid schlächt

doch  schnäll merggsch, de wirdsch halt alt,

bisch nimmi so fit, hesch schnäller kalt.

 

Scho gly kasch e huffe nimm elai,

si mien di pflääge bi dir dehai.

Kurz druffaabe git me dir z’verstoh,

dass es eso nid ka wyter go.

 

Und schnäller als du dänggsch, innert wenig Stunde

hän si fir di e Platz im Altershaim  gfunde.

Jetzt mainsch,  ou jä, do z Basel in e Altersresidänz

d Fraid isch kurz, denn das kunnt nid in d Kränz.

 

Me bringt dir bi, dass du dir das – wie die maischte,

nid bis ans Lääbesänd kasch laischte.

So lang kasch in dym Lääbe gar nid grampfe,

dass imme Schwyzer Haim jede Daag darfsch mampfe.

 

Usserdäm als Gascht wurdsch dert allewyyl nyt zelle,

numme als wytere Koschtepunggt, wo me gar nid het welle.

Und denn die steriili und unfrindligi Umgääbig

isch nid menschewürdig, nai - eher schääbig.

 

Nadiirlig kasch im Vaterland in sone Haim yyne hogge,

wenn de mit Schwarzarbet duesch di Sagggäld uffstogge.

S‘lääbelang hesch zaalt und bisch zer Arbet gange,

was isch dr Dangg, me loot di aifach hange.

 

Ergo, was macht me wemme alt wird und sich nimi ka bugge ?

me zaigt als Eidgenoss em Haimatland dr Rugge.

Ewägg vo däne seeleloose Abfertigungsstette,

dert aane, wo si aim hälfe, pflääge und rette.

 

Färn ab vo dr Haimat, s‘isch aigentlig e Schand,

dert aane, wo‘s warm isch, zue de Palme an Meeresstrand.

Thailand stoot do ganz vorne im Renne,

dert hesch dini Butzfrau, e Pool und e Bungalow zem penne.

 

Jetz froggsch di grad, sollsch die Verwandte verachte oder liebe,

wenn si di aifach in e fremds Land abschiebe?

Mit dr Begrindig, dass au sii weder fir d‘Mamme no dr Babbe

en Uffenthalt im Altershaim kenne berappe.

 

Scho glyy hesch die Gedangge vergässe,

denn do gniessisch d’Sunne, dr Service und s Frässe.

Vierezwanzig Stund isch ebber fir di do,

und luegt, dass es dir guet duet go.

 

Das alles fir wenig Gäld,

dass es so ebbis no git uff däre Wält !

Dehaim wär d‘Ränte jetzt scho duure

und du wärsch völlig uff dr Schnurre.

 

Nääbedra wurde die Ryyche protze,

bluffe mit em Gäld, s‘wär zem kotze !

Do gniessischs lieber wyt ewägg mit wenig Stutz

und hausch ab, und drzue no uff e Butz.

 

In dr Schwyz sin d‘Pflääghaim ständig unterbsetzt,

und die Aagstellte wärde umeghetzt.

Bi de Thais hingege,  hets gnueg Lyt

und alli nämme sich fir di Zyt.

 

Reschpäggt dien si dir au entgegebringe,

vo däm kasch bi uns kai Liedli singe.

S‘ isch beschämend, wenn me als Schwyzer so muess brichte,

und im Alter uss em Land duet flichte.

 

Was solle mir mache - si wänn‘s eso,

s‘ ganz Lääbe wird aim s‘Gäld zem Sagg ussgno.

damit mir e scheeni Ränte hän,

uns am Schluss meh als mer hänn, au wieder gänn.

 

Fir d‘Regierig bedytte die Alte nyt me - kasch sicher syy

am liebschte hätte si statt e Altershaim - e Deponie.

So kennte si e huffe Keschte umgoo,

und iber‘s Broblem Räntner, Gras waggse loo.

 

Zem Glygg git‘s no Länder, wo‘s nid so isch

und wo du als Gascht willkomme bisch.

Dert frooge si sich nid, was das soll nutze

wenn si dir mien’s Fiidli butze.

 

Si dien‘s dr nid in Rächnig stelle.

wenn zem Ässe e Glas Wasser meh duesch bschtelle.

Irgendwenn schiebt me in unserem Land denn Fruscht

wäge de Räntner und ihrem Kaufgraftverluscht.

 

Me ka numme hoffe,  s‘isch denn nooni z’spoot,

will alles numme ins Ussland goot.

Fyr die, wo in unser Land kemme und nyt schaffe,

duet me e huffe Glotz zämme raffe.

 

Vyyllicht kennt me jo bi dääne statt gää, e bitz Gäld  abschränze

und eso de Alte dr Räntebatze ergänze.

Mir wänn jo wirgglig nid iibertriibe,

aber so langs nid so isch, kenne mir nid bliibe.

 

 

Drum saage mir diräggt:  „kunnsch druss,

mir hauen ab, mir checken uss!“

Mit Rheuma, Gicht, Demänz -

           Ab nach Thailand in e Alter-Residänz!