GYZ ISCH GEIL ! -DR 8-ER FAHRT UFF WEIL

 

Si dien in Schaare iiber d‘Schwoobegränze wandere

die Grosse und die Glaine, aine noch em Andere

im Gsicht e zfriides Lache

mit em Ziil e huffe Schnäppli zmache

 

Aber glyy muesch nimmi in Kaare hogge

oder gar no zfuess dert iibere jogge

will dr 8er fahrt fir e faire Bryys

diräggt ins Yykaufsparadies

 

Denn dert kenne mir Eidgenosse profitiere

und in bryyswärti Waare inveschtiere

ob Angge , Brot oder e Wurscht

ob Schyssibabyyr oder eppis geege dr Durscht

mir haue dert ääne mächtig uff e Putz

und hän am Änd glyych no voorige Stutz

 

Rund acht Milliarde Frangge bringe mir so in grosse Kanton

die vom schwyzer Gwärbverband finde das e Hohn

si gän deene d’Schuld, wo bi de Schwoobe geen go boschte

und das bi uns d‘Läde schliesse oder‘s Arbetsstelle duet koschte

 

Numme was soll das, mir wärde jo au nid gfroggt

bivoor uns dr Staat wider uff em Gäldseggel hoggt

egal ob Granggekasse oder Schtyyre, du hesch nyt zsaage

s wird uffegschrubt do muesch zaale, sunscht goots dr an Graage

 

Als Byspiil : fir dä Bryys wo mir z Basel zwai Bier dien kaufe

hämer bi de Schwoobe sovyyl gsoffe, dass mer nimmi kenne laufe

und dr Glotz wo no ibrig blybt, bruche mer ohni vyyl Tam Tam

fir d Haimfahrt mit em 8er Tram

 

S Yykaufe in unserem Vaterland

isch wirgglig allewyyl e Schand

bisch bi dr Kasse duure dernoo kunnts Fatale

muesch no go Gäld uuseloo zem dr Parggblatz z‘zaale

 

Do kunnt uns allne aifach s‘ Kotze

wenn so hoochi Tier dien ummemotze

wo am Änd no sälber - s‘isch allerhand

geen go Schnäppli jaage im Schwoobeland

 

 

Und denn d‘Politigger wonis die Shoppingtoure wän vermyyse

das sin denn die richtig Fyyse

die fahre mit em 8er iibere, und hän e grossi Glappe

in dr Hand s General-Abo, wo mir mit de Schtyyre berappe

do isch jo klar, dass die dopplet spaare

also worum solle mir nid wyter dert uuse fahre?

 

Ich bi doch nid bleed, dien si inere Wärbig immer saage

mir sin ebbe schlau und fülle dr Waage

mir wärde allewyyl in 8er schtyyge

und was mer meege draage in d‘Däsche byyge

 

Do solle sich die andere no lang uffreege

mir dien was mer derte spaare uff d‘Sitte leege

und sotte mir emool gnueg uff dr hoche Kante ha

trifft me nis villicht au imene Schwyzer-Laaden aa.