„150 anni amore, dolce vita, e porca miseria!”

 

Incredibile! – fallt uns do ii

Denn die Gschicht ka numme unglaublig sii

 

Cia Bella, come stai

Deen so scheen, fyylsch di graddehai

aber z’italiedehai, dasch jo dr Mischt

fyylt sich heechstens no e Turischt.

 

Denn der isch gar nyt me bim alte

Naai, die Nation isch lengschtens gschpalte.

Dr ryychi Norde wurd gärn Padanie sii,

dr armiSüüde soll doch verregge derbyy.

Kurz und bindig, s’isch e Schand,

s interessiert sich kai Tschingg fir’s Vaterland.

Usser, wenn si bim Schutte gwinne,

denn kenne si mit Fähnli wingge und ummespinne.

 

Guet – mir wänn jo nid bees sii, das liggt is färn,

mir hän jo unseri Italos gärn.

 

Tricolori, Pasta, Grappa

Und e Vino fir dr Pappa.

Spaghetti, Pizza, Stracciatella,

Kasch tutti quanti bim Italiäner bschtella.

 

Adesso haisst: - grad jetzt,

Occupare: - s’isch grad bsetzt,

puzzare haisst: - es schtinggt e chlii

wie d’Abfallbärge z’Napoli!

Aber um was es doo jetzt aigentlig goot,

isch das, wo in dr näggschte Ziilestoot:

 

150 anniversario unita d’Italia

Das kasch uff unseri Sprooch au grad no ha.

Das haisst: 150 Joor Italie dien mir fyyre

Staatsschulde hämer vyyl, laider in Euro und nid in Lire

Nadiirlig wär dä Geburtsdaag vyyl scheener ohni

Korruption, Mafia und Berlusconi.

Au dr Papscht bringt is nyd, s’isch e Hohn !

Dä g’heert jo dene vom grosse Kanton.

D’Regierig isch überall am penne,

Bisch am falsche Ort e Espresso am Suffe,

schiesst di d’Mafia iibere Huffe

und dr Schugger, wo denn sott ko

het grad e Streik in Aagriff gno.

 

La Vita e bella… s’isch ebbe nid fir jede scheen do

Drum het’s syt Joore Lyt, wo das Land dien verloo.

Mir z’Basel hän si mit offene Arme empfange,

hän mitene gschafft und sin mitene uff d’Wälle gange

 

Mir hän e Grund das Fescht jetzt z’gniesse

Und die 150 Joor z’begiesse.

Uff em piazza die piedi nudi ( Seibi ) hämmer das au gmacht.

Mit de Italiäner zämme gässe,gsoffe, glacht.

Hesch es g’seh? Kunsch druss?

Frindschaft goot iber d’Gränzen uss!

 

Italia, e Land wo nid sott untergoo,

wo wyter sott im Lääbe stoo!

Mir hoffe, die nei Regierig glemmt sich in „Culo“

Und git sich Mieh

Und duet dä scheeni Stiefel wieder zem Drägg uss zieh.

Vyylicht entwigglet sich eso, s’wär jo allerhand.

 

Attentione! – dä Zeedel isch bald am Änd.

Zer Warnig, fir die wo lenger lääse wänd:

Machets wie d’Italie – der isch’s au gange,

die hän wieder miese vo vorne aafange!

 

Ciao a tutti ! I vostri teste d’aqua di reno

Euri Rhywasser-Kepf.