D Grindigsgschicht

Cele Beuret
Cele Beuret

Im Joor 1948 sinn im Restorant Landhof d Rhywasser-Kepf grindet worde. Dr Babbe vo de Rhywasser-Kepf haisst Cele Beuret. Mir gehen aber no zwai Joor zrugg, ins Joor 1946, denn isch nämmlig grad dr Grieg umme gsi und Cele het mit syner zuekinftige Frau, Millie und de baide Brieder Amman Fasnacht gmacht. Dr aint Amman het die beriehmti Handorgeleschuel gha und dr andere e Schallblattegschäft. Der Cele und s Millie hänn in dämm Handorgeleclub mitgspiilt. Im Joor 1947 het dr Cele d Guggemuusig Baggemuge grindet und biraits s Joor druff het är mit syne Baggemugge am Moschtre mitgmacht. Anno 1948 het’s vom Handorgeleclub en Absprung gäh und dr Cele het nit ebbe uffgheert spiile, nai, är het’s aifacher gmacht und sälber e Handorgeleclub ins Lääbe gruefe. Rhygold het dä nej Handorgeleclub ghaisse und nääbe Gartefeschtli sinn au Uffdritt bi Radio Berominschter ko. Dr Handorgeleclub Rhygold het sich aimol in dr Wuche im Reschtorant Landhof zer Broob droffe und s syg deert allewyl luschtig zuegange.

Dodermit het aigentlig d Gschicht vode Rhywasser-Kepf aagfange, dr Cele nämmlig d Idee kaa e Wageglygge z grinde. Är het syni Handergeler gfroggt was si drzue maine und vom Rhygold ze de Rhywasser-Kepf isch’s denn nimme eso wyt gsi. D’Idee isch do gsi, d Migliider sinn do gsi und dr Gliggename isch au do gsi.

Zem an dr Fasnacht kenne mitmache het’s nadyrlig no ainiges me bruucht, e Wage, en Ort zem Baue, Material, dr Fritz Trüb, het dr nejgeboorene Glygge sy Garte vom Reschtorant zem Wagebaue zer Verfiegig gstellt. Em Cele si Frau, s Millie het sich als Goschdymschnydere zer Verfiegig gstellt und wohrschyns het s Millie das eso guet gmacht, dass zwaiedrissig Joor druss worde sinn. Au zwaiedrissig Joor het dr Cele uf em Buggel, nämmlig zwaiedrissig Zedel het är gschriibe und zwaiedrissig Wäge het är ghulfe zämmebaue, - e haillooslangi Zyt. Dr Cele isch aber nit numme dr Grinder, sondern au dr Obma vo de Rhywasser-Kepf gsi und das au zwaiedrissig Joor lang. Dr Edi Frank het anno 1981 s Amt vom Obma aadrätte.au dr Edi isch wohre Fasnächtler gsi. No vor sinere Gliggekarriere bi de Rhywasser-Kepf het är als Ainzelmasgge bim Intrigiere vyyly Brys abgholt. Dr Edi het si Amt als Obma mi vyyl Härzbluet ussgfiehrt. Laider isch är denn im Joor 2000 verstorbe und het e grossi Lugge in der Glygge hinterloh. Trotz dämm schwäre Schlag hänn sich d’ Rhywasser-Kepf wieder gfange und hänn mit em neje Obmaa Jörg Flückiger mit vyyl Zueversicht in Zueunft gluegt. In de Joore 2002 bis 2006 hänn d’ Rhywasser-Kepf mit em e glaine Mitgliderbestand ums Iiberlääbe kämpft. Mit em Noochwuggs hets nit so rächt welle klappe. Sit em Joor 2007 isch es denn uffwärts gange und e jungi Generation isch in der Glygge aane gwachse. Dr Jörg het si Amt als Obmaa im 2009 denn au am Lucien, ain vo dr junge Generation, abgäh. Dr Generationewächsel het statt gfunde – und das isch guet eso.

D Grindigsgschicht und d Chronik vo de Rhywasser-Kepf isch in der Gegewart aaglangt und mr hoffe, dass d’Fasnacht wyterläbbt und das blybt was si isch, glunge, scheen und suuber.